အမှား -
အမှားတဲ့ - -
ဤလောကတွင် မည်သူမဆို အမှားများကို ကျုးလွန်မိလေ့ရှိကြသည်။ ထိုသို့ကျုးလွန်ကြရာဝယ် ခြေဆော့၊ လက်ဆော့၊ မတော်တဆ ကျုးလွန်မိသော အမှားများထက် အသေအခြာ စနစ်တကျ ကျုးလွန်သော အမှားများ သည် ပို၍မိုက်မဲတက်ကြသည်။ မိမိရဲ့ လောဘ၊ အတ္တ၊ မာန်မာနများကြောင့် မှားသော အမှားအတွက် မိမိအပြစ် ကို မိမိသာလျှင်ခံယူရဲသည် ဟုဆိုသော်လည်း ထိုအမှားသည် တိုင်းပြည် တစ်ခုလုံး နှင့် ကိုယ်ပြည်သူတွေကို ရာစု နှစ်နှင့်ချီကာ ကမ္ဘာနှင့်ယှဉ်လျှင် အောက်ကျနောက်ကျ ခံစားစေသည့် ကြီးမားသော အမှားကြီးမျိုးကို ကျန်ုပ်တို့ မြန်မာလူမျိုးများ ထဲမှ ၂.၈.၁၈၆၆ တွင်တစ်ကြိမ် ကျုးလွန်ခဲ့ကြ ဖူးပေသည်။ ထို့ကြောင့်ပင်လျှင် တိုင်းပြည် ဖရိုဖရဲဖြစ်ကာ တပါးကျွန်ဘ၀သို့ ကြရောက်ခဲ့ရပေသည်။ ကိုယ့် သားအရွယ်တိုင်းတပါးသားကို ဒူးထောက်၊ သခင်ခေါ် ၊ ဘုရားထူးနေကြ၇သည့်အဖြစ်ကို နာကျဉ်းခဲ့ကြသည့် အတွက် တတိုင်းပြည်လုံး ကျွန်ဘ၀မှ ကွင်းလုံးကျွတ်လွတ်အောင် လွတ်လပ်ရေးကိုဆောင်ကျဉ်းပေးခဲ့သည့် အပြင် အင်္ဂလန်ကို အမှီလိုက်ဖို့ ဒို့မြန်မာတွေ ကုန်းလုပ် ၊ ကြုံးလုပ် ၊ ပြဲအောင်လုပ်မှ တော်ရာကျမယ်လို့ သင် ကြားပေးခဲ့တဲ့ တမျိ်ုးသားလုံး၏ ကျေးဇူးရှင် ဗိုလ်ချုပ်အောင်ဆန်းကို လုပ်ကြံခဲ့သော ၁၉.၇.၁၉၄၇ နေတွင် ဦးစောတို့ ကျုးလွန်ခဲ့သော အမှားသည် ပြန်လည်၍ မရနိုင်သော ဆုံးရှုံးမှုကို မြန်မာတို့ ဆုံးရှုံးခဲ့ရသည်။
မြန်မာတို့သည် ရာဇ၀င်တလျှောက် ဇာတိသွေး၊ ဇာတိမာန်၊ သတ္တိ၊ စစ်မဟာဗျုဟာ များကို ကျွမ်းကျင်ပိုင်နိုင် ခဲ့ကြသည်မှာ သံသယဖြစ်ဖွယ်မရှိချေ။ အဘယ့်ကြောင့်ဆိုသော် အာရှတိုက်၏ ခေတ်အဆက်ဆက် မြေမျက် နှာ သွင်ပြင်ရော လူဦးရေ အရပါ ပိုမိုသာလွန်သော အင်အားကြီး နှစ်နိုင်ငံကြားတွင် မိမိတို့ လူမျိုးနှင့် မိမိတို့ နယ်နိမိတ်ကို ခိုင်မာစွာ ထားရစ်ခဲ့နိုင်ကြသည်။ဤသို့ တည်တန့်စွာ ရပ်တည်နိုင်ရန်အတွက် ကျန်ုပ်တို့ အဘိုး၊ ဘေးတို့သည် အသက်၊ သွေး၊ ချွေး ၊ တို့နှင့် ဘ၀များ မည်မျှပေးအပ်ခဲ့ကြရသည်။ မည်မျှစတေးခဲ့ကြသည်ကို မှန်းဆ၍ပင်မရချေ။ တည်တန့်ပြီးသားနိုင်ငံတော် ကို ကမ္ဘာနှင့်ယှဉ်၍ ခေတ်မှီတိုးတက်အောင် လုပ်ဆောင်နေ သော ကနောင် မင်းသားကြီးကို လုပ်ကြံလိုက်ကြသော အဖြစ်သည်ကား ဘယ်လိုအရေးကိုမှ မျှော်တွေးမ ကြည့်တက်ကြသော အာဏာရူးမိုက်ကန်းကန်း လူတစ်စုပင် ဖြစ်တော့သည်။ သက်ဦးစံပိုင် ဘုရင် စနစ်တွင် လုပ်ကြံမှုများစွာထဲမှ ဆုံးရှုံးနစ်နာမှု အကြီးမားဆုံးလုပ်ကြံမှုပင်ဖြစ်သည်။
မြင်ကွန်း၊ မြင်းခုန်တိုင် မင်းသားနှစ်ပါးသည် မင်းတုန်းမင်းကြီး၏ သားတော် အရင်းတွေ ပင်ဖြစ်သည်။ ဘုရင့် သားဆိုသည့်အတွက် သူတို့လည်း ဘုရင် ဖြစ်ချင်ပေမည်။မင်းတုန်းမင်းက ညီတော် ကနောင်မင်းသားကို အိမ်ရှေ့အရာအပ်နှင်းသည့် အခါမှာ သူတို့အတွက်ရာဇပလ္လင်သည် ဝေး၍သွားခဲ့ပေသည်။ဆိုးသည်က မြန်မာ မင်းတွေသည် မိဖုရားများများထားပြီး မွေးလာတဲ့ သားတော် တိုင်းဟာ ဘုရင်ဆိုသည့် အိမ်မက် ကို မက်လို့ရသည့် အဖြစ်ကြောင့်ပင်ဖြစ်သည်။ တနေ့အခါ မြင်ကွန်း၊ မြင်းခုန်တိုင် မင်းသားနှစ်ပါးသည် ဥယျာဉ်တော်မှာ ပျော်ပါးကစားကြပါသည်။ ထမင်းစားချိန်ရောက်တော့ ဆာလာသည်နှင့် ပြန်ကြတော့ လေးသိန်းတံခါး အထွက်တွင် နွားဖြူလေးတစ်ရှဉ်းကိုတွေ့ပြီး သတ်စားကြပါသည်။ ထိုနွားနှစ်ကောင် သည် မင်းတုန်းမင်း၏ မင်္ဂလာ နွားဖြူလေး နှစ်ကောင်ပင်ဖြစ်သည်။ မင်းတုန်းမင်းက အကျဉ်းချသော အခါ ညီတော် အိမ်ရှေ့မင်းသားကို တာဝန်ပေးပါသည်။ အိမ်ရှေ့မင်းသားကြီးက နှစ်ပတ်ချုပ်ပြီး ပြန်လွတ်ပေးလိုက်ပါသည်။ ထိုအဖြစ်ကြောင့်ပင် အိမ်ရှေ့ကိုယ်တော်ကြီးအား မြင်ကွန်းမင်းသားက ပိုမိုအငြိုးပြင်းထန်လာခဲ့ပါသည်။ ထိုအချဉ်းအရာ ကို သတိထားမိသော ကိုယ်တော်ကြီးက မြင်ကွန်းမင်းသား ကြေးတိုက်မှထွက်သော နေ့မှာပင် သမီးတော် တောင်ညိုမင်းသမီး သီရိဘဒ္ဒါဝတီ နဲ့ လက်ဆက်ပေးလိုက်ပါသည်။ လူကြီးစိတ်နဲ့ အရှက်တော်ပြေအောင် မငြိုးမထားအောင် စီမံလိုက်ခြင်းဖြစ်သည်။ တူတော် ကို သမီးတော် ပေးပြီး သမက်တော်ခဲ့ခြင်းလည်းဖြစ်သည်။ သို့သော် သစ်ကောက်၊ ၀ါးကောက်တာကိုသာ မြင်ရပြီး လူစိတ်ရဲ့ အတွင်း ကောက်မှုကို ကနောင်မင်းသားကြီး မမြင်ရှာခဲ့ပါ။
လုပ်ကြံမှုအရေးတော်ပုံမှာ ဦးပုည မြောက်ပေးနေတယ်လို့ကြားသောအခါ ကနောင်မင်းသားကြီးက ခေါ်စစ်ပါ သည်။ ဦးပုည က ဘူးခံနေသော အခါ မင်းတုန်းမင်းက ပညာရှိတစ်ယောက် ချမ်းသာစွာနေပါစေလို့ အမိန့် တော်ချခဲ့လေသည်။ နောက်ဆုံး ဦးပုည ကို နန်းတော်တွင်း သုံးနှစ် ၀င်ထွက်ခစားခြင်းမပြုရလို့ အမိန့်တော်ချ မှတ်လိုက်ပါသည်။ ထိုအချိန်တွင် မြင်ကွန်းမင်းသားကြီး ၏ အကြီးတော် ငသံမှို သည် ကျွန်တော်မျိုးငါးဆယ် နဲ့ ဓါးရေး လှံရေး လှို့ဝှက် သင်ကြားနေပါသည်။ ကနောက်မင်းသားကြီးသည် ဓါးပြီး လှံပြီးသည်ဟု ဆို၍ မြင်ကွန်းမင်းသားတို့က အစီအရင်များ လုပ်ကြပါသည်။ ငသံမှို က ဦးစီးပြီး ဓါးလုပ်မည့် သံချောင်းကို ကိုးသချိုင်းမှာ ကိုးရက်မြုတ်စေပြီးမှ ဓါးလုပ်ပါသည်။ ဓါးဖြစ်လာပြီဆိုသောအခါ ဆေးဝါးမန္တန်တို့နဲ့ အစစအရာ ရာ မလိုရလေအောင် သိဒ္ဓိတင်ထားပါသည်။ ဦးရီးတော်ကိုလုပ်ကြံဖို့ ပေါ်ပေါ်ထင်ထင်ပြောနေသည့်အပြင် အခါတော်ပေးဖို့ ဦးပုည ကို မိန့်ဆိုနေသည်ကို သိရှိသွားတဲ့ တောင်ညိုမင်းသမီးသည် ခမည်းတော်အိမ်ရှေ့ မင်းသားကြီးထံသို့ အစေတော်လွတ်သည်။ ထိုအစေတော်က မြင်ကွန်းမင်းသားထံသို့ စာကို အပ်လိုက်သော အခါ မြင်ကွန်းမင်းသားက စာကိုဖတ်ပြီး အိမ်ရှေ့မင်းသားကြီးထံသို့ သွားပို့စေပါသည်။ ထို့နောက် ဒေါသထွက်နေသော မြင်ကွန်းမင်းသား၏ လက်တွင် တောင်ညိုမင်းသမီး နတ်ရွာလားရရှာလေတော့သည်။ သမီးတော်ရဲ့ သတင်းပေးစာနဲ့ သမီးတော် အသတ်ခံရသည်ကို မည်သို့မျှအရေးမယူသော အိမ်ရှေ့ကိုယ်တော် ကြီး၏ လုပ်ရပ်များကို နားမလည်နိုင်ဖြစ်မိသည်။ ထိုသို့ အမှတ်မထင်နေမှုကြောင့် မကြာလိုက်မီ အချိန်လေးအတွင်းမှာပင်လျှင် အိမ်ရှေ့စံ ကနောင်မင်းသားကြီးအဖို့ အဖြစ်ဆိုးနှင့် ကြုံတွေ့ခဲ့ရပေတော့သည်။
ထိုနေ့ အတိအကျမှာ ၁၂၂၈ ခုနှစ် ဒုတိယ၀ါဆိုလပြည့်ကျော် ( ၇ ) ရက် - ခရစ်နှစ် (၂.၈.၁၈၆၆) နေ့ဖြစ်သည်။အချိန်က နေ့လည် တိမ်းစပြုနေချိန်၊ လွတ်တော်အစည်းအဝေး မှာ စတင်နေပြီဖြစ်သည်။ ကင်းဝန်မင်းကြီး ဦးမာလိန်၊ သူရဲဝန် ဦးရွှေလုံး၊ မြတောင်မြို့စားသေနက်ဝန်၊ မလွန်မင်းသား၊ ပြင်စည်မင်းသား၊ စကုမင်းသား စသည့်မင်းသားများသည် အဆင့်အတန်းလိုက် ခစားနေကြလေသည်။ လွတ်တော်ခန်းမရဲ့ ထိပ်တွင် အိမ်ရှေ့စံကနောင်မင်းသားကြီးက ထိုင်နေတော်မူသည်။ နိုင်ငံရေး၊ ပြည်ထဲရေး ၊ အင်္ဂလိပ်တို့ရဲ့ နယ်ချဲ့မှုများကို စီစစ်၊စေငု၊ စစ်ကြော နေသည်။ထိုအချိန်တွင် လွတ်တော်ဆီသို့ မင်းသားတစ်ပါး အသက်လု၍ ပြေးလာနေသည်။ ထိုသူမှာ မြင်ကွန်းမင်းသားပင်ဖြစ်သည်။ နောက်မှ လက်သုံးတော်ကြီး ငဖြူသီးက ဓါးလွတ်ကိုင်၍ ပြေးလိုက်လာသည်။ မြင်းကွန်းမင်းသားက လွတ်တော်အတွင်းသို့ ဦးရီးတော် ကယ်ပါအုံးဘုရားဆိုပြီးပြေးဝင်လာသည်။ ရုတ်တရက်ကြောင်သွားသော်လည်း အခြေအနေမူမမှန်သည် ကို သိသော ကနောင်မင်းသားက လှေကားမှ လွတ်တော်အပေါ်အထိ ပြေးတက်သွားသည်။ အနားရောက်လာသော ငဖြူသီးက ဓါးဖြင့်ခုတ်ရာ ခြေသလုံးကို ခုတ်မိပြီး လှေကားပေါ်တွင် လဲကျသွားသည်။ ထို့နောက် လဲကျသွားသော ကနောင်မင်းသား၏ ဇတ်တော်ဆီသို့ ငဖြူသီးက တချက်တည်း ပိုင်းချလိုက်လေတော့သည်။ ဤသို့ဖြင့် အိမ်ရှေ့ကိုယ်တော်ကြီး၏ သွေးတို့သည် ရာဇပလ္လင်ခြေရင်းတွင် စွန်းထင်းပေခဲ့တော့သည်။ ထို့ကြောင့်တိုင်းပြည်သည်လည်း စက်မှုနိုင်ငံတည်ထောင်စမှာပင် တစ်စခန်းရပ်ခဲ့ ရပေတော့သည်။ ပြည်သူတွေ အကျိုး တိုင်းပြည်အကျိုးကိုဘေးချိတ်ပြီး ထင်ရာစိုင်း ထင်တိုင်းကြဲခဲ့ကြသော အာဏာရူးတို့ကြောင့် တိုင်းပြည်ဗိသုကာ များ ဆုံးရှုံးခဲ့ရသည်မှာ ခေါင်းဆောင် တစ်ဦးကို လုပ်ကြံခြင်းမဟုတ် ပဲ တိုင်းပြည်နှင့် ပြည်သူ ကို လုပ်ကြံခြင်းပင်ဖြစ်ပေတော့သည်။ ။
ကိုမင်းနောင်ရိုး blog မှကိုးကားချက် ..............
Subscribe to:
Post Comments (Atom)
Posts
No comments:
Post a Comment